Yuh tink I like wake up every marnin’ an’ see you?
Dat I like lef’ meh house, meh pickanee, meh lil piece in dis cowboy country?
Yuh tink dis is how I wan’ live?
Dat I wan’ watch dem minista thief?
Dat I wan’ watch thief watchin’ thief?
Yuh really tink I wan’ hear how yuh beat yuh wife?
And how she tell de police lef’ yuh cause she love yuh?
Bai look, you na tink I gah better ting fuh do dan dat?
Last week when yuh neighbah thief dem fowl an’ end up in front de magistrate, yuh feel I had time with he?
Yuh feel I didn’t sit dunk in de court room and laff meh rass when de chinee lie-ah tell de magistrate dat is hungry yuh neighbah de hungry mek he thief fowl?
Banna, look, is who tell you dat fowl thief na fuh laff in dis country?
Yuh feel me na laff when de mad man de shootin’ up last week?
Yuh na tink dat show yuh is wa dem people in this country deh pon?
Yuh feel dat right now meh heart na hu’tin’ fuh dem people dat dead?
Fuh dem policeman dat gi dem life fuh something dem na know bout?
Bai look, is wa you feel at all?
Couple year back when dem seh fineman shoot up de people dem,
Yuh feel I de wan’ see duh?
Yuh tink I de like seein’ how dem pack de bartica ppl like dead fish?
Is wa you feel at all?
Dat dem tings don’t hu’t meh heart?
Dat meh stomach don’t bun like you wan?
Dat meh eye watah na does leak fuh meh brethren?
Yuh feel dat I don’t feel?
Bai look, is wa you feel at all eh?

Sharing a quick moment with you while I’m on the go.
Sara.